هدية العيد
وموسم الحب

✍️ سلوى شلة

🎉 من مراسم العيد يلي تعلمناها في الغربة بسبب غياب مظاهر العيد وحرمان أطفالنا منها “هدية العيد”.

🦠 وبسبب قضاء أغلب الناس العيد ببيتهم بسبب فايروس #كورونا كلهم رح يعيشوا عيد شبيه بعيد المغتربين.. وفوقها بلا خروج من المنزل ولا زيارات ولا مراجيح…😔

🛍 فتكون هدية العيد كن أجمل الأشياء التي يتلقاها الطفل ليشعر أن العيد وصل فعلاً 🎉🎊

لكن هل هدية العيد فقط من الأب والأم للأطفال؟ 🤔🤔

🛍🎈 هدية العيد برأيي تنقسم ثلاثة أقسام :

1⃣👨‍👩‍👧‍👦 هدية من الوالدين للأطفال : ما بتتخيلوا كمية السعادة والحماس عند الطفل لما يستقبل هذه الهدية.. وكمية الحب بينه وبين الوالدين😊

💌 مو شرط تكون هدية فخمة وغالية، خليها ضمن الإمكانيات لكن احرصوا أن تغلفوها بشكل مرتب إن كان ذلك متاحًا، حتكون حينها الفرحة مضاعفة🤗

🎁 (مرّة عملتلهم هدية العيد تشكيلة أكلات طيبة، ونفاخة بوالين صابون كبيرة، وجزدان صغير معلق بشكلة مفاتيح، وغلفتا بورق للهدايا بشكل حلو، لهلأ بيقولولي إنها كانت أكتر هدية مميزة بسبب التشكيلة فيها، صراحة تفاجأت برأيهم بس قلت الحمد لله على نعمة القناعة😅)

☝️ الهديا البسيطة تعلم الأطفال القناعة، لا تكبروها كتير ولو كنتم قادرين على ذلك.. وخير الأمور أوسطها.

 

 

2⃣👧🏻🧑🏻 هدية من الأطفال للوالدين : خصوصي أنو نحنا غالبا ما بنحتفل بعيد الأم ولا عيد الأب، فالعيد فرصة للتعبير عن الحب للوالدين، يمكن تكون الهدية رسمة أو بطاقة معايدة، أو هدية بسيطة من حساب الطفل، بيتعود الطفل إنو يقدم لأهلو ويعطيهم، وبتزرع محبة كبيرة في القلوب 💙💙

مو غلط إنك أنتي تقولي لولادك (مين جهزلنا هدايا للعيد؟ 😃)، انتو كمان لو قدرتوا تعايدوا أهلكم لا تنسوهم من هدية العيد، وكونوا قدوة صالحة لأولادكم وأدخلوا الفرحة لقلوب أهاليكم 💜

3⃣👦🏻👧🏻 هدية الأولاد لبعضهم البعض: خدي كل ولد من ولادك لحالو مع جنب وقوليلو شو رأيك تجهز لأخواتك هدية؟ وخططو سوا شو بدو يجيب ولو ساعدتيه بمبلغ مالي صغير مو غلط.. خلي العيد يكون موسم حب بين الأطفال، يحبو بعض ويتركوا أثر جميل بنفوس بعض، وتبقى ذكرى حلوة ما بينسوها..

🥺 متخيلين انتو كمية الحزن لما نشوف أخوة كبروا وهنن بيكرهوا بعض نتيجة أنو هنن وصغار ما حبو بعض؟ شي مؤلم جدا 💔

❤️❤️ مشان هيك خلي العيد ينضف القلوب، ويتعلم الطفل يحب أخوه ويقدملو هدية ويعطيه من ماله الخاص، أو ممكن يصنعلو هدية من مواد متوفرة بالبيت.. بيتعلم الكرم والعطاء، وبتخف الغيرة و الحسد، وبتزيد روابط الحب بين الأخوة بالبيت.. 💜💙

لسا في وقت للعيد.. بلشو تجهيز وخططوا سوا انتو وولادكم ليكون هالعيد موسم حب.. 😍

❤️ تهادوا تحابوا ❤️

حطولنا بالتعليقات تجهيزاتكم للعيد😍، زينة العيد والهدايا لو جهزتوها ( ما بنحكي لولادكم، سركم في بير 🤫)