زهرة المرأة الواعية
إنّ العيون التي في طرفها حَوَرٌ
قَتلننا ثُم لم يُحينَ قتلانا
في عنا ثلاثة عناوين مرعبة تجعل من هذا البيت الشعري حسرة لأي فتاة:
الهالات السوداء
الانتفاخ
والتجاعيد
بيقولوا الجلد حول العين هو المرسال الأول للشيخوخة الجلد هون رقيق وحساس…
عدا عن كونه الجزء الأكثر تعرضاً للأشعة فوق البنفسجية…
هاد غير الانهاك الحاصل بسبب التعابير والمشاعر..
طيب شو الحل؟
الترطيب جهازيا وموضعيًا:
– جهازياً كتير نحن مهملين بشرب السوائل ومعتبرينها شغلة محبِّة بس هاد الأساس…
– موضعياً كريم خاص لتحت العين كل يوم مساءً واحرصي على أن يحتوي الكريم على مضاد أكسدة متل فيتامين C وE.
إزالة المكياج: مزيل المكياج بينحط على قطن خصوصي وبينشال المكياج بلطف. مو شد ومط هاد مو دهان ع الحيط ابتعدي عن المحارم الخشنة ولا تكون إيدك قاسية.
العادات السيئة: وأشهرها السهر والتدخين والطعام المالح (البزورات طول الليل) إذا عندك انتفاخ حول العين جربي في البداية تتبعي حمية غذائية صحية.
الواقي الشمسي والنظارة الشمسية: طبعا لازم نحمي العين من الأشعة المسببة للشيخوخة اختارول واقي شمسي يكون جيد النوعية… ونظارة مناسبة تغطي محيط العين.
المساج: لا مانع نعمل مساج خفيف تحت العين لما منحط الكريم المرطب مثلاً لحتى نزيد التروية الدموية في المكان.
