زهرة المرأة الواعية
☝️بعد موافقتي على ابن الحلال صاحب الخلق والدين ويلي رح يرتحله قلبي وعقلي….
👩🏻🦰👩🏻👵🏻🧓🏻 إذا اجت الناس وبلشت تقلي بنت خالك وبنت عمتك وبنت الجارة حقوقها كذا وإنت مو أقل منها
🎯 رح جاوبهم أنا ما رح أتجوز المهر، بكفيني أعيش مع يلي طالبني بمودة ومحبة وتفاهم ويكون بخاف الله فيني لأنه إذا طلع العكس هداك الوقت رح اتركله كل حقوقي لحتى أخلص منه!!
💵💸وأكيد ما رح يكون همي دهبي ومقدمي ومأخري وبعد ما اتركه ما رح أقول كسبت مهر منيح بالعكس رح أقول هي ضريبة اختياري الأعمى😞.
👗👚👠👛 لما رح بلش تجهيز اللبس والذي منه ولوازم العروس ما في داعي يكون الجهاز مكلف مليون واللبس من آخر موضة ويكون مؤلف من تشكيلة واسعة من البيجامات والعبايات والبلوزات والبنطلونات وووووو…… لاااا ومن أغلى الأسعار …
🤰وبعد بسنة من عرسي كله رح يبطل أو يصغر علي بسبب الحمل… شوية عقل يا جماعة
أصلا أنا مارح أعمل مد جهاز ومارح أسمح أنه تصير أغراضي فرجة لشوفت الحال وأنه كل فضولية تقعد تتفرج على خصوصياتي… من الداخلي👙 إلى الخارجي👗…
👰🎊 يوم عرسي ما رح أعمله بصالة فاخرة ولا بمزرعة شرحة بس مشان خاطر الناس يلي رح تجي وتبلش حكي وتعليق على كل صغيرة وكبيرة وما بيعجبها شي بالآخر….
🚶♀🚶♀هنن رح يروحوا وأنا رح أكمل مع شريك حياتي فليش التعقيد بكفي أعزم الحبايب يلي رح يفرحولي من قلبن…. 💁♀ العرس للفرح مو للمظاهر الي بيسبقها نكد التجهيز وبيلحقها نكد التعليق!!!
🛏 وأكيد ما بدي غرفة النوم من أخشاب الزان الموجودة بغابات الواق واق… ولا غرفة نوم من أفخر الماركات ومستوردة من بلاد أوروبا ولا حتى تركيا… بكفي غرفة نوم تكون مرتبة وظريفة ابدأ فيها حياتي وأنا نفسيتي مرتاحة وقلبي فرحان…
🕳 إذا غرفة النوم فخمة ويلي مشاركني فيها فحمة الافضل خليني على سريري ببيت أهلي لأنه والله هيك رحمة
🏠 لسا استنوا في البيت والله ما بدي ياه بأفخم المجمَّعات ولا أرقى الأحياء ولااا لازم مساحته الف متر… 6 غرف و7 رسيبشن و 5 حمام و 4 مطبخ و 16 بلكونه!!!!
❤️ أي مكان رح يجمعني بالشخص يلي اختاره عقلي وقلبي رح يكون جنة والله… وعلى فكرة مافي داعي تدخلوا تعملوا جولة لتتفرجوا على كل تفاصيله وخصوصياته… اهلا وسهلا بالغرفة الي رح استقبل فيها الضيوف.
🤷♀☝️ الناس ما رح تعيش معي ولا رح تشاركني الحلوة والمرة….يلي رح يعيش معي ويشاركني حياتي ويكمل معي بقية عمري هو يلي لازم انتبه لمساحة حُبه… ليش أدخل على بيته وهو كرهانني من النكد والهم الي سببته ياه ليأمن طلباتي…
✋ اتركونا نختار اللي رح يريحنا لأنه هي حياتنا نحن… 👊 ولما رح نتخانق لا الدهب و لاغرفة النوم ولا البيت الواسع ولا المظاهر الفاضية رح ترجعنا لبعض…
💝 حبنا واحترامنا وتفهمنا وتقديرنا لبعض هو اللي مهما بعدنا رح يرجعنا
❌ بلا مقارنات بترجاكم و تركواا الناس تجيب يلي على قد ظروفها و يلي رح يريحها و يلي رح تستخدمه وبس و بلا تدخلات في حياة الناس
🌚 مو الوحدة بتكون ×××× عند أهلها -عدم المؤاخذة- وتقلك انا بدي وبدي وأبوها ما بيملك شي… لك حتى كرَّهتوا الشباب بالزواج حسبي الله ونعم الوكيل
💐 الله يفرح قلبكن و يهديكن ما تحملوا الناس فوق طاقتها… وكل وحدة تنشغل بحالها، وتتواضع لتصل لسعادتها… والخيار إلها ولأهلها… والنتيجة هي أول مين رح يتحملها…
